واحدة هبلة بالوراثة فاكرة لمجرد ان ربنا اكرمها (أو فتنها يعلم الله) بترد على زوار مدوناتها اللي عبروها و وضعوا تعليق على ما كتبته بترد تقول:
ماهو انا مش مسئولة عن غباء كل اللي بيقرا البوستات
مع اني عارف اني مش غبي بس دمي اتحرق لأن التعليق بتاعها كان بعد تعليقي بفركة كعب
و اللي حرق دمي أكتر اني ترددت أعلق عندها من باب “وإذا خاطبهم الجاهلون قالوا سلاما” لكن حسمت أمري و قلت أقول كلمة طيبة و بمنتهى الاحترام من باب “قالوا معذرة إلى ربكم و لعلهم يتقون”

الموضوع كان عن عمرو خالد و تقرير مجلة فوربس (النسخة العربية) عن انه أعلى الدعاة دخلاً
التقرير مبالغ فيه و مبني على تقديرات غير دقيقة
الهبلة لوت عنق الحقيقة كما يقولون و استنتجت ان عمرو خالد و السويدان و القرني منافقون باعوا دينهم بدنياهم
و انهم لكونهم أغنياء فهم مخالفون لما كان عليه النبي صلى الله عليه و سلم و بالتالي يا اما يكون عمرو غلط يا اما النبي صلى الله عليه و سلم غلط “يا حلاوة”
عمرو خالد كما أوردت في تعليقي على مقالتها (البوست كما تسميه بنت الـ… ) يعمل في شركة كبيرة و يتقاضى أجراً كبيراً و ليس لأحد أن يحاسبه على دخله, و سمعت من زمن أنه نفى أن له عوائد من أي عمل غير وظيفته.
الفاضلة المحترمة تتهم قراءها بالغباء و لا عجب فكل يرى الناس بعين طبعه
لا أعلم مشكلة هؤلاء مع عمرو خالد بالذات و لن أنفي التهمة التي يقذفون بها كل من يدافع عن الرجل .. نعم أنا من دراويش عمرو خالد, أحب هذا الرجل و أسأل الله أن يرزقني و اياه الاخلاص و اللي مش عاجبه يخبط دماغ أمه في الأرض.
جتكم الأرف مليتو البلد

توبة من الرد على السفهاء و عودة لمبدأ “من خرج من مدونته اتقل مقداره”

ان شاء الله في الفترة القادمة أنوي كتابة تدوينات قصيرة و قد أغلق التعليق على بعضها ان رأيت أن “ليس هناك ما يقال”
ما شجعني على العودة هو نشاط صديقي اللدود في مدونته.

تنويه صغير لأصدقائي المقربين فقط: هذه التدوينة غير قابلة للتعديل لأي سبب بما في ذلك الشتائم و السباب و القذف و خلافه

مرة الريس عايز يزود شعبيته فقال لرئيس الوزراء يعلي الأسعار فالناس تتضايق يقوم هو ينزلها، فعلا رئيس الوزراء زود الأسعار، بس الناس ما اتكلمتش، عادي خالص،

الريس استغرب قوي، وقاله: طب خلي الضرايب على المرتبات خمسين للمية. زود رئيس الوزراء الضرايب خمسين فى المية، الناس هزت دماغها وسكتت.

الريس اتجنن وقال لرئيس الوزرا بص، طلع أي قرار غشيم من عندك يخلي البلد تولع، رئيس الوزرا عمل ضريبة اللي يعدي كوبري يدفع عشرة جنيه، الناس نفخت و ضربت كف بكف ودفعوا، فقام رئيس الوزرا خلى اللي يعدي يدفع عشرة جنيه وهو طالع، وعشرة جنيه وهو نازل من الناحية التانية، الناس قالت اللهم طولك يا روح و أمرنا لله و دفعوا.
رئيس الوزرا كبرت فى دماغه، وأمر إن اللي يعدي بعد ما يدفع عشرة جنيه، و هو خارج من الكوبري ياخد على قفاه، و نزل الريس بنفسه متنكر يتابع الموقف، الناس تدفع وهية طالعة الكوبري عشرة جنيه، و عشرة جنيه و هية نازلة و تاخد على قفاها وتمشي،
شوية و لقى واحد بيزعق و متضايق، وطى على ودنه قال له “مالك؟” قال له “حاجة تقرف! أنا متعطل هنا بقالي خمس ساعات..ما ينفعش كدة ..لازم يزودوا الناس اللي بتدينا على قفانا

نقلاً عن رسالة بالبريد الالكتروني من صديق أخشى ذكر اسمه لأنه ببساطة صاحب عيال
بدقة أكتر صاحب عيلة زي القمر و عاوزه يعيش لحد ما يربيها عشان اتجوزها و بعدين ابلغ عنه